Основниот кривичен суд Скопје информира дека адвокатот Јовица Страшевски вчера доставил допис дека од 8 до 17 јануари ќе биде на годишен одмор. Со ова, како што велат од судот, се прават обиди за одолговлекување на главната расправа закажана за 13 јануари годинава.

„Поради интересот на медиумите за предметот што во јавноста е познат како „ТНТ“ и постојаните опструкции на поединци – странки во постапката, во целост го објавуваме последниот допис кој вчера кон крај на работното време беше доставен до судот. За последните случувања и обиди за одолговлекување на главната расправа насрочена за 13 јануари, судот ќе ја извести Адвокатската комора и Судскиот совет“, се вели во соопштението од Основниот кривичен суд Скопје.

Страшевски е адвокат на поранешниот градоначалник на Општина Гази Баба, Тони Трајковски во случајот „ТНТ“. Одбраната на обвиниетите во „ТНТ“ во изминатиот период укажуваше на судечкиот совет дека мандатот на поротничката Лилјана Ивановска Кочовска е завршен на 24 декeмври и оти според Законот за кривична постапка, доколку дојде до каква било промена на составот на судечкиот совет, судската постапка мора да започне од почеток.

Постапката, сепак, продолжи и беа одржани неколку рочишта по 24 декември, а судечкиот совет, укажуваше на фактот дека не е во нивна надлежност да одлучуваат за престанок на мандат на судија поротник и оти тоа е прашање на Судскиот совет.