Имам апсолутна доверба во него, рече премиерот во оставка Кирил Петков, предлагајќи го Асен Василев за нов премиер на Бугарија во видео обраќањето кое заврши пред малку.
Нема да дозволиме Бугарија да тргне во погрешна насока и странски дипломати да даваат насока, рече Кирил Петков. „Сметам дека Асен Василев е личноста која нема да го дозволи сето ова“.
„Бугарија е на историски крстопат. Мораме да одиме напред. Најважните реформи за државата мора да се спроведат за 6 месеци. Да се обединиме во име на европската иднина на Бугарија“, рече Петков.
„Нема поважна функција или позиција од оваа задача. Затоа вчера предложив на состанокот на ‘Промените продолжуваат’ следниот бугарски премиер да биде Асен Василев. Имам несомнена доверба во него. Рамо до рамо со Асен Василев ја започнавме промената. Ви ветувам дека рамо до рамо ќе ја завршиме“, рече во своето обраќање Кирил Петков.
Мандатот денеска во 17:00 часот треба да го врачи претседателот Румен Радев. (Р.Н.)