„Мистериозниот хепатитис“ од кој досега се заразени повеќе од 230 деца во светот, предизвика големо внимание во јавноста. Можноста дека е регистриран и кај дете во Србија ги загрижи и македонските родители. Од Институтот за јавно здравје велат дека досега кај нас нема регистриран случај на ваков тип хепатитис кај деца.
„Внимателно се следи состојбата и соодветно ќе бидат преземени превентивни мерки и активности доколку тоа го налага состојбата” велат оттаму.
Во Србија се истражува еден случај кај дете за кое постои сомневање дека има акутен хепатитис од непознато потекло, односно заболување на црниот дроб најверојатно предизвикано од аденовирус, кој бил дијагностициран кај деца од предучилишна и училишна возраст, во повеќе од 20 земји.
Детето кое се лекува во детската болница во Белград мора да биде под постојан лекарски надзор бидејќи тоа е болест која не знаеме што ја предизвикува, а може да биде фатална за млад организам, вели проф. д-р Драган Делиќ, инфектолог-хепатолог и поранешен директор на Клиниката за инфективни болести во Белград.
Болеста е често асимптоматска или блага, особено кај деца помлади од пет години. Кај возрасните, почетокот на болеста е обично нагло со зголемена телесна температура, слабост и болки во стомакот, а жолтицата е доминантен симптом. Симптомите на болеста може да траат од 1-2 недели па сѐ до неколку месеци. По инфекцијата останува доживотниот имунитет; не е позната појавата на хронична инфекција. Смртноста од болеста е ниска.
Мистериозниот хепатитис најпрво се појави во Велика Британија, а потоа во Ирска, САД, Израел, Холандија, Шпанија, Данска, Италија, Норвешка, Франција, Белгија, Романија, Јапонија, Канада, пишува британски „Гардијан“.