Советникот на украинскиот претседател Михаило Подољак изјави дека руските сили и денес на Велигден „континуирано ја напаѓаат“ опколената фабрика за челик Азовстал во Мариупол.
„Православен Велигден 2022 година. Но, токму сега, Руската Федерација континуирано го напаѓа Мариупол и Азовстал“, рече тој на Твитер. „Местото каде што се наоѓаат нашите цивили и војска е гранатирано со тешки воздушни бомби и артилерија. Русија уште трупа сили и опрема за напад“, вели Подољак.
Рускиот претседател Владимир Путин изминатата седмица тврдеше дека руските сили го постигнале „ослободувањето“ на Мариупол, но им нареди да не ја преземат фабриката Азовстал, последниот голем бастион на украинската одбрана во градот.
„Руската Федерација треба да размислува за она што остана од нејзиниот углед“, рече Подољак, повикувајќи ја Русија да објави велигденско примирје во Мариупол, да отвори хуманитарен коридор за евакуација на цивили и да се договори за „специјална рунда преговори“ за размена на воени сили.
Металуршкиот комбинат Азовстал засолнува повеќе стотици војници и цивили а резервите од храна и лекови се при крај. Украинската вицепремиерка Ирина Верешчук пред неколку дена рече дека таму има „околу 1.000 цивили и 500 ранети војници“.
Јуриј Риженков, извршниот директор на компанијата што ја поседува фабриката, во четвртокот за Си-Ен-Ен изјави дека ситуацијата таму е „блиску до катастрофа“.