По објавувањето на сторијата на НОВА ТВ за лажното предизборно ветување на ВМРО-ДПМНЕ за голема инвестиција во Македонски Брод, со реакција се јави инвеститорот од Америка „Броадстоне дефенс“.
Дописот до НОВА ТВ е од управителот Денис Прат, пратен преку неговиот адвокат Пандорка Кимова.
земјиштето во Македонски Брод каде требаше да се изгради фабриката
Од „Броадстоне дефенс“ објаснуваат дека во Македонија дошле на покана на македонската влада, а првично им била понудена да ја купат фабриката „Еурокомпозит“ од Прилеп.
„Во мај 2016 година, по неколкуте состаноци помеѓу „Броадстоне секјурити“ и претставниците на македонската влада, беше утврдено дека во објектот во Прилеп нема да се дозволи поризводство на муниција поради неговата близина до градот. По разгледувањето на неколку други локации што ги предложи Владата, беше утврдено дека Македонски Брод ќе биде најдобрата локација за ваков објект“, пишува во дописот од „Броадстоне секјурити“.
Денис Прат
Од американската компанија се жалат дека потрошиле значителен износ на пари и време во текот на следните 12 месеци во планирање, подготвување и поддршка на инвестиции за градење на земјиштето во Македонски Брод, кое го купиле на јавен повик и платиле даноци, но никогаш не станале сопственици на парцелата.
„Поради одолговлекувањето на стекнување на земјиштето, сега, речиси една година откако „Броадстоне“ влезе во Македонија, инвеститорите за изгубија својата доверба да инвестираат во земја која ги прекршила условите што сама ги определила и го изгубија својот деловен интерес, па одлучија да следат други можности. Ова налагаше „Броадстоне“ да се повлече од проектот и да побара правна помош за поврат на средствата платени на македонската влада за земјиштето и даноците. Не е поднесена ниту една тужба против Владата на РМ,ниту пак „Броадстоне“ сака да покрене судска постапка. Компанијата едноставно бара македонската влада да ги рефундира парите за земјиштето и за даноците кои се платени во врска обидот за стекнување на земјиштето. Ако не се даде поврат на уплатениот износ, Броадстоне го задржува правото да преземе правни мерки“, вели Денис Прат.
Како што објави НОВА, фабриката за оружје во Македонски Брод беше најавена непосредно пред изборите, дури беа фрлени и првите лопати за изградба на фабриката. Но, наместо сега во јуни да почне првото производство на оружје и муниција, несудените инвеститори разочарани од празните ветувања на претходната власт, решија да не инвестираат во Македонија и да им се вратат вложените пари назад.
