Невакцинираните и хронично болните да не одат на свадби, советува микробиологот Никола Пановски откако се зголеми бројот на заразени со коронавирусот во Тетово. Тој ги советува граѓаните да бидат внимателни.
Вели дека само вакцинираните и оние кои го прележале вирусот можат да одат на свадби. Додава дека повозрасните и сите луѓе кои имаат хронични болести, треба да си останат дома, во интерес на здравјето.
„Нашите иселеници од земјите во кои нагло се шири делта вирусот, слободно влегуваат во државата. Има свадби и слави и на отворено и на затворено, а токму тоа му треба на вирусот. Препорачувам што повеќе луѓе да се вакцинираат и да ги почитуват мерките во затворено. Ако се невакцинирани и одат на свадба и таму има луге од земјите каде се шири делта сојот тоа значи дека се под висок ризик дека ќе се заболат, вели Пановски.
Тој претходно кажа дека најпатриотски гест на сите наши иселеници кои летово ќе си дојдат дома е претходно да се вакцинираат, или да направат барем еден тест за ковид-19, 24 часа пред да тргнат на пат.
Инаку, во Тетовскиот регион активни се 65 случаи на коронавирусот. Денеска во земјава беа регистрирани 21 нов случај на ковид-19, од кои 11 од Тетово.
Комисијата за заразни болести ја следи состојбата во Тетово по зголемениот број на заразени со коронавирусот.
Министерството за здравство соопшти дека по зголемување на бројот на заразени од тестирани во Тетово и тетовскиот регион, за период од неколку дена, Комисијата за заразни болести ја следи епидемиолошката состојба и е во комуникација со локалниот Центар за јавно здравје.