Седум лица се спасени од големите бранови во Јадранско море кај Бар во невремето што попладнево го зафати и црногорското приморје, соопштија од тамошната Управа за поморска безбедност. Четворица тинејџери од Црна Гора и од Косово се спасени од високите бранови во Сутоморе додека тројца се извлечени од немирнитте води кај Чањ, пишуваат медиумите во Подгорица.
Сите влегле во морето и покрај истакнатите црвени знаменца на плажите кои означуваат забрана за капење, но и предупредувањата на Директоратот за вонредни ситуации за невреме што остануваат на сила во Црна Гора.
Брановите на места достигнувале висина до два метра. Четворицата тинејџери (три момчиња и девојка) во водата кај Сутоморе биле на 300 метри од брегот и поради високите бранови не можеле да допливаат до копно.
„Залудно се обидувале да се вратат. Никако не можеле да успеат покрај двометарските бранови. За среќа никој од нив не е повреден. Со чамци на Управата за поморска безбедност и пограничната полиција се одвезени до Бар каде ги чекаа возила на Итна помош. Според наши сознанија, момчињата и девојката се добри“, изјави Сафет Кочан, директор на црногорската Управа за поморска безбедност.
Тој нагласува дека четворицата влегле во море и покрај предупредувањата и црвените знаменца, а апелот за помош пристигнал од други капачи кои биле немоќни сведоци од брегот. Црна Гора сè уште е под опасност од нов бран на невреме (обилни врнежи, силни грмотевици и ветар) што според прогнозите се очекува во текот на ноќта.