Власта се обидува предизборно да изврши притисок врз вработените во институциите кои работат на полето во културата, обвинува Виктор Илиески од Независниот синдикат на културата.

Како што неодамна објави на својот Фејсбук профил, Илиески за НОВА вели, станува збор за притисок во неколку институции во форма на потпишување нови договори и решенија на вработените коишто ќе бидат во согласност со новите измени во Законот со култура а кои се донесени без согласност на над 800 членови на независниот кандидат.

– Ние како независен синдикат на културата не го признаваме тој закон и ги одбиваме сите тие членови коишто се за дисциплинирање, казнување и мерки кои се во Законот за култура, заради лошото третирање на вработените, појаснува тој.

Независниот синдикат апелира до сите вработените да ги одбијат договорите, а Министерството да го стопира процесот во овој предизборен период.

Имено, како што вели Илиески, во измените се наведени изречити казни и дисциплински постапки и се предвидува договорите да се променат од неопределено на определено време. Дополнително истите измени, предвидуваат ставка која вели дека на секои три години би имало реаудиции на музичарите, балетаните, актерите со можност да се загуби работното место.

– Можат да останат на улица многу еминентни уметници доколку директорите ја злоупотребат својата позиција во изборот за членови во комисијата на овие аудиции, бидејќи со две неположени испитни реадуции, уметниците може да го загубат своето работно место на кое биле 15 или 20 години, потенцира Илиески.

Тој наведува дека и покрај тоа што досега одржаа два протести, а исто така не наидоа на слух од страна на министерката Канческа-Милевска, предлозите на независниот синдикат не беа ниту разгледани ниту ставени на маса.

Своите предлози ги доставиле до неколку политички партии  за измени  во законот, и истите да се најдат во предизборна програма кај некој што ќе го слушне нивниот глас, бидејќи како што вели Илиески, моменталните власти декларативно се за уметниците, а никогаш не ги прашале за нивните проблеми.

Во април годинава, кога се носеа измените во Законот за култура, независниот синдикат протестираше пред Министерстовото за култура под слоганот „Културата не ви ја трпи тортурата“, но беа етикетирани како политички мотивирани.

Тие тогаш добија поддршка и од пензионираните колеги, кои велат, власта воопшто не е едуцирана за да управува во оваа област.