Независната пратеничка група на ВМРО ДПМНЕ и коалицијата, во целост ги отфрла, како што велат, лажните наводи изнесени од пратеникот Антонио Милошоски, во вчерашната емисијата „Што не е јасно“ на Алфа телевизија, каде што тој ги обвини за поткуп за гласањето на уставните измени.
„Исто така , во континуитет од раководството на ВМРО – ДПМНЕ се изнесуваат вакви клевети за поткуп. Го охрабруваме пратеникот Антонио Милошоски и останатите од раководството на ВМРО ДПМНЕ, доколку имаат докази за ваквите клевети веднаш да ги пријават во Јавното Обвинителство. Во спротивно најавуваме дека ваквите наводи ќе треба да ги докажуваат во судски постапки“, се вели во реакцијата на независната пратеничка група.
Независната пратеничка група деновиве се споменува и како евентуален клучен фактор во донесувањето на законот за јавно обвинителство, во случај ВМРО-ДПМНЕ да го блокира процесот. Такво сценарио не исклучија ниту лидерот на СДСМ, Зоран Заев, ниту министерката за правда Рената Дескоска. Од независната пратеничка група рекоа дека до крајот на неделава ќе го изградат својот став по тоа прашање.