Ники Лауда во животна опасност

Трикратниот шампион во Формула 1, Ники Лауда е во лоша здравствена состојба во виенската болница, по трансплантацијата на бели дробови.

Шеесет и девет-годишниот Австриец е опериран во четвртокот поради тешка болест на белите дробови, велат од болницата. Претходно, Лауда помина низ две трансплантации на бубрег.

– Молиме за разбирање, семејството не сака да дава јавни изјави, се обидуваме да ја сочуваме приватноста на семејството Лауда, објавија од болницата.

Според медиумите во Австрија, сепак, тоа е сериозна операција по која Лауда е во животна опасност.

Белиот дроб на Ники Лауда беше засегнат уште при ужасната несреќа на „Нирбургринг“ на 1 август 1976. Тогаш Лауда вдиши отровен чад, што води до тешки повреди на белите дробови. Ова беше најголемата штета по тешката несреќа во која изгоре голем дел од телото на пилотот. Од тогаш, белите дробови на Лауда функционирале ограничено.

Австриецот е во болница веќе 13 дена, а неговата состојба е далеку по драматична од претходните предвидувања.

Се верува дека Лауда на Ибица се заразил со летен грип и првично ја потценил ситуацијата. Кога симптомите се влошиле, сопственикот на авиокомпанијата „Laudamotion“ заминал за Виена.

Како последица на вирусот, Лауда првично помина неколку дена во интензивна нега пред да се врати во нормален режим. Меѓутоа, во четвртокот неговата состојба се влошила повторно.