Поранешниот шеф на дипломатијата и на секторот европски прашања, Никола Димитров формира невладина организација под името Солуција. Во описот освен краткото име Солуција се додава и подолга референца, а тоа е дека полето на дејствување ќе биде – Балкански центар за конструктивни политики.
Промоцијата ќе биде в четврток на 27 април, преку мини дебатен настан наречен „Македонски ден на мрмотот“, на кој ќе учествуваат звучни имиња како Филип Рикер, некогашниот грчки премиер Јоргос Папандреу и Рајнхард Прибе. Тројцата се добро познати на домашната и на светската јавност. Рикер е поранешен амбасадор на САД во Македонија, кој извршуваше и високи позиции во Стејт департментот поврзани со регионот, Прибе е човекот кој се обиде да ја стави нашата земја на реформски колосек но само делумно успеа, а Јоргос Папандреу е припадник на легендарната грчка политичка династија кој кратко беше премиер на Грција за време на бурните настани од должничката криза.
Невладината организација ќе ја претстави Димитров кој е нејзин претседател и коосновач, а високите гости ќе бидат панелисти кои ќе говорат на темата на настанот – излез од лавиринтот на корупцијата и клиентелизмот.
Меѓутоа она што ја интересира политичката јавност на Македонија со оглед на политичката биографија на Димитров е дали групацијата околу него ќе прерасне во партија со оглед дека тој долго време беше во врвот на македонската политика и дипломатија, што е основа за продолжување на неговите политички амбиции.
Како што дознава Нова за почеток на Димитров му се приклучува групата „Шанса за центар“ на советничката во скопската општина Центар Јана Белчева Андреевска. Се тврди и дека околу Димитров ќе орбитрираат и екс-директорката на Сорос во Македонија Фани Каранфиловска, новинарот и колумнист Ивор Мицковски и други.
Наши извори тврдат и дека „ќе се обединат повеќе организации како платформа на вредности и принципи“ кои ќе се залагаат за „меритократија – вистински луѓе на вистински места“. Како што дознаваме на настанот в четврток ќе говори и познатиот политиколот Марко Трошановски како претставник на „Шанса за Центар“ и на Институтот за демократија. Се најавуваат и други учесници од невладини организации.
Инаку забележително е дека во овие прегрупирања се главно личности кои припаѓале на орбитата на СДСМ, како што е Јана Белчева Андреевска која иако формално независна на локалните избори во 2017 беше носителка на листата на советници на СДСМ за општина Центар. Подоцна влезе во судир со советничката група и со партијата СДСМ и се издвои како „Шанса за Центар“ преку која и денес е советничка во скопската општина која се смета за упориште на социјалдемократите.
Иако во старт се негира било какво политичко дејствување, тајмингот на појавување на невладината организација и нејзините придружни групи се совпаѓа со предизборниот период за претседателските и парламентараните избори кои треба да се одржат во првата половина на следната 2024 година, односно изборниот воз ќе тргне за десет месеци од сега.
Димитров за порталот „Сакам да кажам“ не потврди но ниту негира амбиција за политичка партија. „На почетниот настан ќе ја промовираме нашата невладина организација – Балкански центар за конструктивни политики Солуција, една од нашите први иницијативи. Ќе имаме и домашни и меѓународни важни гости со кои ќе разговараме како да се најде излез од лавиринтот на корупцијата и клиентелизмот. Повеќе за невладината, но и за конкретната иницијатива ќе кажеме на и по настанот“, изјави тој за „Сакам да кажам“.
Во Законот за политички партии е пропишана одредба дека за регистрација на партија се потребни нотарски изјави од 1000 граѓани – членови на партијата.
Соња Крамарска