Дополнителниот заменик министер за земјоделство, шумарство и водостопанство, Љупчо Николовски на денешната прес-конференција повторно истакна дека криминалот на власта имал огромни последици по безбедноста и сигурноста на граѓаните, а со поплавите на површина испливале целото неодговорно и криминално работење.
– Само во 2014 година, преку Агенцијата за финансиска поддршка на земјоделството и руралниот развој, исплатени се повеќе од 2,5 милиони евра за одржување на каналска мрежа за одводнување и наводнување на земјоделско земјиште и инвестиции наменети за водостопанство. Повторно, овие пари легнуваат на сметките на фирмите блиски до владејачката партија. Се работи за следните:
Стентон градба – близу 400 илјади евра
Силекс Неметали – близу половина милион евра
Трансмет – близу 700 илјади евра
Жикол – над 800 илјади евра, изјави Николовски.
Тој потенцираше дека во конечниот извештај за финаниското работење за 2014 година, Државниот ревизор констатирa дека близу 3 милиони евра се исплатени токму преку оваа мерка без при тоа да биде спроведена контрола на лице место и за тоа официјалните контролори на Агенцијата да достават записници.
– Од парите за чистење на канали близу 700.000 евра, завршиле во фирмата „Трансмет“. Нејзиниот сопственик Сеад Кочан, на почетокот на оваа година ја отвори и ТВ Нова, уште една телевизија на која можат да се слушнат многу пофални зборови за власта. Се работи за „оној што има Сеат Ибица“, како што би рекол Никола Груевски, а слушнавме во „Вистината за Македонија“. Близу половина милион евра завршиле кај Силекс Неметали, фирма во сопственост на Силекс АД Кратово, која пак е во сопственост на коалициониот партнер на Груевски, Љубислав Иванов – Ѕинго, чиј син е пак сопственик и на Сител телевизија. Во време на склучување на договорот со Силекс Неметали и исплата на парите, министерот за земјоделство Михаил Цветков, е член на Управниот одбор на Силекс АД Кратово. Тоа е класичен судир на интереси, за кој веќе поднесовме кривична пријава и очекуваме разврска, истакна Николовски.