Лица кои беа во придружба на сопругата и на ќерката на Митко Чавков ми се закануваа денеска додека бев спроведуван во Судот. Чавков директно ми се закани и на денот на изрекување на пресудата, изјави Александар Василевски-Нинџа на почетокот од денешната расправа во Апелацискиот суд за случајот „27 април“.
Судот, на тоа укажа дека, затворските служби што го вршеле спроводот, требало да направат записник, а Василевски додаде дека добивал закани и од политичари додека бил во притвор што неодамна и лично ги пријавил кај обвинителката Вилма Русковска.
Обвинетите за упадот во Собранието на 27 април во 2017 година и нивните адвокати денеска на вториот ден од тридневната јавна расправа пред Апелацискиот суд во Скопје, продолжија со образложение на поднесените жалби за пресудите по предметот. За односниот случај и поради соработка со Обвинителството, Василевски доби казна затвор од осум годни, што е најмала во однос на сите што беа опфатени со обвинителниот акт.
Меѓу 16. обвинети кои со првостепената пресуда во март лани беа осудени на вкупно 211 години затвор за кривичното дело „терористичко загрозување на државниот поредок” се поранешниот директор на Бирото за Јавна Безбеднист (БЈБ), Митко Чавков, припадници на МВР и Агенцијата за разузнавање.
Обвинителството, пак, има жалба за ослободителната пресуда за Игор Дурловски. Бранителот на Чавков, адвокат Сашко Дуковски, на денешната јавна седница рече дека случајот е неодржлив, бидејќи на средината од постапката имало амнестија на дел од првично обвинетите, како и дека за истиот настан веќе имало друг случај што бил побрзо процесиран и каде обвинетите поминале со бенигно обвинение.