Претседателот на Албанија Бујар Нишани по средбата со македонскиот претседател Ѓорге Иванов на маргините на Глобалниот самит во Баку, Азербејџан, ја предупредил Македонија дека не треба да се прави обид политичката криза да се претвори во етничка, го пренесува АФП соопштиението од Канцеларијата на албанскиот претседател.
Агенцијата објавува дека Нишани оценил дека „обидите политичката криза да се претвори во етничка криза би можеле да имаат сериозни последици по сите“, се вели во соопштението.
Во соопштението од Кабинетот на претседателот Иванов за средбата со Нишани, објавено во четвртокот, пак, се вели дека се разговарало за односите меѓу двете земји во контекст на актуелната политичка состојба во Република Македонија, како и во контекст на состојбите и предизвиците во регионот.
Притоа се пренесува само она што Иванов го рекол на средбата, односно дека го реафирмирал ставот „дека начинот на кој се донесе пост-изборната платформа на партиите од албанскиот политички блок и изјавите кои следеа од страна на високи функционери на Република Албанија претставуваат мешање во внатрешните работи на Република Македонија“.
– Ваквото мешање во внатрешните работи на Република Македонија е поттик за реализирање на големо националистички идеи, тензии и претставува негативен пример не само на Балканот, туку и пошироко. Потребно е намалување на тензиите во регионот и внимателна реторика, се вели во соопштението од Кабинетот на Иванов.