Авторот на синоќешниот напад во Ница не им бил познат на француските служби за разузнавање, не бил регистриран како радикализиран и се уште ниту една терористичка организација не соопштила дека стои зад овој напад, изјави попладнево францускиот обвинител Франсоа Моленс.
Обвинителот потврди дека во нападот загинале 84 лица, 202 лица се ранети помеѓу кои 52 лица се во тешка состојба и лекарите се борат за нивниот живот и 25 лица се во реанимација.
Помеѓу загинатите има 10 десет деца и тинејџери. Помеѓу жртвите има Французи но и Американци, Руси, Швајцарци, Белгијци и повеќе други националности. Медицинските служби работат на утврдување на точниот идентитет на сите жртви.
Моленс изјави дека истрагата почнала во ноќта, веднаш по нападот. Според досегашните утврдени факти, станува збор за човек од 31 година роден во Тунис и со живеалиште во Ница, бил разведен и татко на три деца.
Истрагата сака да утврди дали овој човек имал соработници или било каков контакт со други лица кои можеби му помагале да го изврши нападот.
Моленс го опиша патот на белиот камион кој со голема брзина влегол на Променадата на Англичаните, позната улица во Ница и убил 84 лица. Камионот бил изнајмен во понеделникот во Ница а документите на убиецот биле исправни.
Во камионот е најден мобилен телефон, лична карта на убиецот и документи кои истрагата ги проверува, две лажни пушки, еден лажен пиштол и еден пиштол со мал калибар 7.65 мм како и куршуми за пиштолот.
Човекот бил шофер и и бил познат на полицијата но не како терорист. Во март оваа година бил осуден на 6 месеци условно поради насилство со оружје направено во јануари годинава.
И покрај тоа што досега не е утврдена врска со терористичка организација, француското обвинителство отвори истрага за тероризам.
Обвинителот Моленс изјави дека методот на нападот одговара на повиците и советите за убиство што ги испраќа терористичката организација Исламска држава во своите пропагандистички материјали.
Екс сопругата на терористот е приведена утринава во Ница. Истрагата сака да утврди кои се мотивите на овој човек и дали имал соработници за нападот.