Со цел воспоставување на националното собрание на млади и советодавното тело на млади, предвидени во Законот за младинско учество и младински политики, вчера во Скопје, Националниот младински совет на Македонија (НМСМ) одржа иницијативна средба за формирање на националното собрание на млади, соопштија денеска од НМСМ.
Во присуство на 40 младински организации и претставници на Владата, Министерството за социјална политика, демографија и млади и меѓународните организации, се дискутираше моменталната состојба и предизвиците при воспоставувањето на законски дефинираните механизми за младинско учество на национално ниво и се дефинираа конкретни чекори и динамиката за финализирање на процесот, пишува во соопштението.
Како резултат на оваа средба, се додава, младинските организации потпишаа декларација со што ги потврдуваат заедничките заложби за формирање функционални механизми за младинско учество и конкретно формирање национално собрание на млади.
По средбата, како што се истакнува, се очекува да се формира координативно тело што ќе има за задача да ги спроведе сите потребни чекори за иницирање и организирање на собранието, како и информирање на младинските организации и релевантните институции за улогата на ваквото тело.
Оваа средба е продолжение на напорите што НМСМ, заеднички со останатите чадор организации Коалиција Сега и Сојузот за младинска работа, ги спроведуваше во текот на минатата и оваа година, што имаа за цел да се поттикне поголема имплементација на Законот за младинско учество и младински политики и да се даде можност на младите суштински да се вклучат во процесите на креирање политики. Националното собрание на млади и националното советодавно тело претставуваат загарантиран простор каде младите и младинските организации можат да влијаат на политиките и да придонесат кон креирање на програми што одговараат на нивните реални потреби. За да придонесе кон овој процес, покрај измените и дополнувањата на Законот што беа доставени годинава до Собранието, НМСМ изготви и прирачници за воспоставување и работење на двете тела, се наведува во пишаната изјава на Мариана Ангелова, генерален секретар на НМСМ.
Овој настан е дел од проектот „Функционални механизми за младинско учество на национално ниво“ поддржан со грант Национална интервенција на регионалниот проект СМАРТ Балкан – Граѓанско општество за поврзан Западен Балкан, финансиски поддржан од Министерството за надворешни работи на Кралството Норвешка.