Фер, демократски и кредибилни избори посакуваат Владата, учесниците на изборите и политичките партии, но овој пат и со една додавка која ја отсликува суровата реалност со коронавирусот, а тоа е заштитата на здравјето на граѓаните. Предвремените парламентарни избори на 15 јули се особено важни бидејќи долго време државата функционира во вонреди услови со техничка влада и без Парламент.
Согласно политичкиот договор постигнат пред одложувањето на изборните дејствија во март, за првичниот датум на изборите 12 април, и последниот договор како и уредбите на Владата, изборните дејствија продолжуваат онаму каде што запреа, со дополнителни протоколи за заштита на здравјето на граѓаните поради коронавирусот.
Тоа значи дека кандидатските листи се веќе потврдени, заклучен е регистарот на медиуми, завршено е пријавувањето на дијаспората за кое овојпат немаше доволен број пријавени и таму нема да се гласа, извршена е ждрепка за редоследот на избирачкото ливче, а завршени се и други дејствија.
Од незавршените најважно е ажурирањето на Избирачкиот список односно МВР треба да достави податоци до ДИК, треба да се доедуцираат односно во случајот да се спроведе комплетно нова едукација на здравствените избирачки одбори, како и на членовите на Избирачките одбори и општинските изборни комисии, согласно здравствените протоколи, треба да се испечатат изборните ливчиња, ДИК да изготви упатства за многу од активностите на терен и гласањето, продолжува и пријавувањето на набљудувачите на изборите…
На изборите на 15 јули ќе настапат 15 коалиции со 1.598 кандидати
Носителите на кандидатските листи за предвремените парламентарни избори утре во Државната изборна комисија (ДИК) утре ќе потпишат Кодекс за фер и демократски избори. Потпишувањето на Кодексот за фер и демократски избори е обврска која произлегува од член 8-в од Изборниот законик.
ДИК пред донесувањето на мартовската Уредба на Владата за запирање на изборните дејствија и одлуката на политичките лидери за одложување на предвремените парламентарни избори закажани за 12 април, ги потврди листите на 15 коалиции и партии со 1.598 кандидати, а го утврди и изгледот на гласачкото ливче.
Со свои кандидатски листи во сите шест изборни единици ќе учествуваат ДУИ, коалицијата „Можеме“ предводена од СДСМ и Беса, коалицијата „Обнова на Македонија“ предводена од ВМРО-ДПМНЕ, политичката партија ИНТЕГРА, „Никогаш северна, секогаш Македонија“, Демократи, Алијанса за Албанците и Алтернатива, Левица и Работничката партија и ДПА. 
СДУ, ГДУ и Глас за Македонија нема да учествуваат во „шестката“, односно поднесоа листи само за изборните единици 1, 2, 3, 4 и 5. „Твоја партија“ доставила кандидатски листи за изборите единици 1, 2 и 5.
Носители на листите на Коалицијата предводена од ВМРО-ДПМНЕ се професорката Гордана Силјановска во Изборната единица (ИЕ) 1, Владо Мисајловски во ИЕ 2, Игор Јанушев во ИЕ 3, Александар Николовски во ИЕ 4, оперскиот пејач Игор Дурловски во ИЕ 5 и Дафина Стојановска во ИЕ 6.
СДСМ за овие избори направи коалиција со БЕСА, која на кандидатските листи има 14 членови на партијата.
Носител на листата на СДСМ во ИЕ 1 е актуелниот министер за надворешни работи, Никола Димитров, во ИЕ 2 – Оливер Спасовски, во ИЕ 3 е генералниот секретар на партијата, Љупчо Николовски, во ИЕ 4 е лидерот Зоран Заев, воп ИЕ 5 е министерката за одбрана Радмила Шеќеринска и во ИЕ 6 е лидерот на БЕСА, Билал Касами. Карактеристично за овие листи е тоа што е запазено правилото половината од кандидатите да бидат жени.
Претседателот на ДУИ Али Ахмети ќе биде носител на кандиидатската листа на партијата во ИЕ 6, Талат Џафери во ИЕ 5, поранешниот министер за економија Беким Незири во ИЕ 3, министерот за образование Арбр Адеми во ИЕ 2 и партискиот потпретседател, Изет Меџити во ИЕ 1.
ДПА има кандидатски листи во пет изборни единици. Носител на листата со кандидати за пратеници во ИЕ 6 е лидерот на партијата Мендух Тачи, во ИЕ 1 е Ниметула Демири, во ИЕ 2 е Орхан Ибрахими, во ИЕ 3 е Сами Рушити, во ИЕ 5 е Васви Доко. Партијата ќе нема свои кандидати во ИЕ 4.
Лидерот на Алијансата за Албанците Зијадин Села е носител на кандидатската листа на коалицијата со Алтернатива во ИЕ 6, додека Африм Гаши од Алтернатива е носител во ИЕ 2. По потпишувањето на Кодексот за фер и демократски избори, ДИК ќе изврши ждребка за определување на билбордите за политичко рекламирање.