Хекери се обиделе преку злоупотреба на идентитетот на младата активистка за климатски примени Грета Тунберг да воспостават контакт со премиерот Зоран Заев. Хибридниот напад бил пресретнат, потврден и разобличен пред неколку дена објави советникот за односи со јавност, Марјан Забрчанец во рамки на дискусијата за дезинформации на конференцијата е-Општество.
„Телефонскиот разговор бил реализација по претходно користење на официјални брендирани мејл адреси и телефонски броеви, хибридни центри за манипулација и преку официјален контакт со македонско дипломатско претставништво пришто претставувајќи се како Грета Тунберг и нејзиниот татко. Разговорот се оствари пред неколку дена, но иако одредени делови во него биле сомнителни, сепак, премиерот одлучи разговорот да се реализира до крај со цел да се разоткрие сомнежот“, истакна Забрчанец.
Фото: theatlantic.com
Веднаш по завршениот разговор биле направени сите неопходни проверки за верификација на идентитетот на соговорникот и се потврдило дека е станува збор за хибриден комуникациски напад врз кабинетот на премиерот. Веднаш било стапено во контакт и со семејството на Грета Тунберг пришто биле запознати со сите детали. Од таму бил добиен одговор дека и тие се многу вознемирени од ваквата вест и најавиле дека случајот со злоупотреба на нивниот идентитет ќе го пријават до надлежните органи.
Грета Тунберг, шведската тинејџерка која покрена движењето за борба против климатските промени Fridays for Future, го сврте светското внимание врз себе особено по обраќањето во Њујорк на климатскиот Самит на Обединетите нации. Од говорницата упати порака до светските лидери дека планетата умира поради нивните празни зборови и предизвика различни реакции во јавноста, од громогласни аплаузи до оспорувања и тврдења дека со неа манипулираaт нејзината алчна мајка и експерт за односи со јавноста.
Девојчето на возраст од 16 години за само 12 месеци стана лице на борбата за спас на планетата од глобалното затоплување и во септември беше промовирана како една од добитниците на алтернативниот Нобел, наградата „Рајт лајвлихуд“ за нејзината инспиративна акција за итна борба против климатските промени што се заснова на научни факти. Грета стана позната низ целиот свет на 15-годишна возраст, откако секој петок бегаше од училиште со цел да протестира против климатските промени пред шведскиот парламент. Нејзиниот пример го следеа врсници низ целиот свет што спонтано прерасна во глобално движење наречено „Петоци за иднината“.
Мајката на Грета е оперската пејачка и соработничка на „Евровизија“, Малена Ернман, а нејзиниот татко е актерот Сванте Тунберг. Грета во една пригода изјави дека таа прво дознала за климатските промени на осумгодишна возраст и речиси веднаш прашала зошто возрасните не го сфаќаат тоа сериозно.
Овој случај на хибриден напад е многу пософистициран од случајот со руските пранкери, но преземените мерки на внимателност и сеопфатност во комуникацијата и проверките, овозможија случајот да биде разоткриен и разобличен. Овој случај потврдува дека центрите за манипулација користат скапи и софистицирани ресурси кои веќе имаат капацитет да злоупотребуваат идентитети на глобални личности.
Ваквите хибридни напади врз демократските влади имаат цел да ги затворат и заплашат отворените општества. Но, Владата, како што велат од Кабинетот на Заев, и натаму ќе биде отворена и транспарентна во својата комуникација.
