Машката кошаркарска репрезентација на Македонија вечерва ќе биде под победнички императив против Естонија во вториот настап во групата Ц во претквалификациите за Светското првенство во Кина во 2019 година. Двата бода се единствена опција за составот на Јорданчо Давитков за поправање на впечатокот по стартниот пораз во циклусот од Косово.
„Мора да одиграме максимално цврсто и агресивно во одбрана, да бидеме концентрирани во транзиција во обид да победиме. Друг избор немаме. Се надевам дека играчите ја сфатија сериозноста на ситуацијата“, истакна селекторот Давитков.
Покрај кревање на атмосферата по бледото издание, особено во првото полувреме, во Приштина, стручниот штаб во изминатите денови работеше на скаутинг на ривалот од Балтикот. Добрите и слаби страни на Естонците се воочени и предочени, па преостанува и кошаркарите да ги пресликаат добиените насоки на терен.
„Естонија е селекција што игра агресивна кошарка. Речиси сите играчи во ростерот се силни. Играат цврсто во текот на сите 40 минути, доста се подвижни и многу трчаат. Имаат и одлични шутери кои се извлекуваат и шутираат. Ќе биде тешко, но се надевам дека успешно ќе одговориме“, вели предводникот на македонскиот национален тим.
Мечот во „ВИП арена“ при спортскиот центар „Борис Трајковски“ почнува во 20,30 часот.
Претквалификации за СП 2019
Група А
Ерменија – Шведска (18 ч.)
БиХ – Словачка (20 ч.)
Група Б
Австрија – Холандија (19,30 ч.)
Група Ц
Македонија – Естонија (20,30 ч.)
Група Д
Бугарија – Белорусија (17 ч.)