Последниот ден од кампањата за предвремените парламентарни избори ја носи и втората „бомба“. По претпладневната што „одекна“ за лидерот на ВМРО-ДПМНЕ, Христијан Мицкоски, оваа е наменета за лидерот на СДСМ, Зоран Заев. Објавена е на јутјуб каналот „Зоки рекетарот“ со времетраење од 12 секунди и во неа наводно се слуша гласот на поранешниот премиер, се споменува адвокатот Васил Димишков, брат на судијката Весна Димишкова и некаква понуда од шест милиони евра.
Претходно, утринава беа објавени 4 кратки аудио снимки на друг Јутјуб канал именуван како „Обнова на режимот“ во кои наводно се слуша гласот на лидерот на опозициската ВМРО-ДПМНЕ Христијан Мицкоски во разговор со, како што индицира насловот на видеото, „осумтемината независни пратеници од ВМРО-ДПМНЕ“ да не гласаат за измените на законот за јавно обвинителство, како и за предметите на СЈО.
Во изминатиот период на други канали на Јутјуб за време на изборната кампања беа објавени десетина разговори на кои се слушаат гласовите на политичари од власта и од опозицијата.