За денеска е закажана нова средба на работните групи за надминување на разликите околу законот за јавно обвинителство. Според најавите, најпрво се планирани поединечни средби, а по нив и заедничка на работната група составена од претставници на парламентарните партии и експерти, во обид да се усогласи верзија на предлог-закон што подоцна ќе се поднесе во Собранието.
По средбата на работната група во петокот, некои пратенички групи завчера доставиле амандмани за законот за јавно обвинителство, а некои замолиле за дополнително време за формулација поради обврските што ги имаа со „Жан Моне“ дијалогот. Заради доверба на процесот, од Министерството за правда рекоа дека нема да откриваат кои пратенички групи доставиле амандмани.
Опозициската ВМРО-ДПМНЕ не отстапува од барањата за законот за ЈО, откако во петокот го повикаа Министерството за правда да организира средба со правните експерти кои дале забелешки на јавната расправа и заедно со нив да направат амандмани на предлог-законот.
„Нема шанса да отстапиме од нашите барања во однос на законот за јавно обвинителство“, порача вчера генералниот секретар на ВМРО-ДПМНЕ Игор Јанушев.
Во врска со повикот на партискиот лидер, Христијан Мицкоски до Министерството за правда да ги прифати сите забелешки на експертите кои учествувале во јавната расправа, Јанушев забалежа дека министерката Рената Дескока стои наспроти цела правна фела.
„Впрочем, се она што го кажаа експертите, професорите од Правен факултет и сите оние кои на некој начин се поврзани или затекнати со законот за Јавно обвинителство го говорат истото, само Рената Дескоска го говори спротивното“, додаде тој.
За тоа дали ќе се донесе законот пред изборите, Јанушев вели дека според партијата секако дека треба да се донесе, но не онаков, каков што го предлага СДСМ.
Вчера и министерката Рената Дескоска му порача на ВМРО-ДПМНЕ да се посветат на подготовка на амандмани ако сметаат дека се потребни измени во текстот на законот. Само така, вели така, ќе покажат дека се подготвени да ги стават интересите на евроинтеграцијата пред личните интереси на обвинетите и осомничените криминалци од нивните редови.
На петочната, втора средба, на работната група во поширок формат со претставници на политичките партии и пратеничките групи од Собранието, се разговараше за амандманите за подобрување на законскиот текст по дводневната експертска јавна расправа за законот.
Останува отворено прашањето дали партиите ќе успеат да ги усогласат ставовите за да може Парламентот да го донесе законот до распуштањето на Собранието. Според претседателот на Парламентот Талат Џафери, има деловничка можност Предлог-законот да биде веднаш ставен на собраниска седница доколку текстот биде усогласен.
На неопходноста од донесување на законот за ЈО изминатите денови укажуваа и внатрешните политички фактори, но и меѓународната заедница.