Градоначалничката на Скопје Данела Арсовска е разрешена од функцијата претседателка на Заедницата на единиците на локална самоуправа (ЗЕЛС). На денешната седница на ЗЕЛС, по барање на градоначалниците од редовите на ВМРО-ДПМНЕ беше предложено таа да биде разрешена од функцијата а за нов нов претседател е избран градоначалникот на скопска Кисела Вода, Орце Георгиевски.
По седницата на ЗЕЛС, од кабинетот на Арсовска соопштија дека со тоа што градоначалничката била разрешена се покажала коалицијата помеѓу СДСМ и ВМРО-ДПМНЕ.
„Ова е само последниот пример за соработката помеѓу две партии на штета на граѓаните за нивните лични и теснопартиски интереси. На постојниот политички естаблишмент очигледно му пречат луѓе со визија, вредни и чесни, луѓе кои се независни и делуваат исклучително во интерес на граѓаните. На СДСМ и ВМРО-ДПМНЕ очигледно му пречат луѓе кои знаат да кажат ‘не’ на корупцијата и криминалот, луѓе кои јавниот го ставаат пред бизнис интересот на врхушката во партиите“, се вели во соопштението од кабинетот на Арсовска.
Арсовска беше избрана за претседателка на ЗЕЛС на 22 декември 2021, кога потпретседатели станаа градоначалникот на Валандово Перо Костадиновски и градоначалникот на Чаир, Висар Ганиу.