Тенискиот првак Новак Ѓоковиќ се очекува вечерва да пристигне во Белград. Свечениот пречек на Ѓоковиќ, шампионот на овогодинешниот Вимблдон и освојувач на 21 Грен слем титула ќе биде организиран вечерва во 20 часот пред Стариот дворец во Белград. Организатор на дочекот е Тенискиот сојуз на Србија. Државната Радио Телевизија Србија ќе врши директен пренос од овој настан, кој се очекува да се претвори во спектакл во чест на светската тенисерска ѕвезда која во неговата Србија нагалено го нарекуваат Ноле.
Новак Ѓоковиќ по седми пат во кариерата го освои Отвореното првенство на Англија, откако во финалето го совлада Австралиецот Ник Киргиос.
Музичката програма на дочекот започнува во 20 часот на платото пред Стариот дворец. По диџејот, публиката може да очекува настап на Саша Ковачевиќ, а потоа бендот Дејан Петровиќ.
Настапот на Новак Ѓоковиќ на шампионскиот балкон се очекува околу 21 часот и 10 минути.
Иако по седми пат во кариерата го освои Вимблдон, најдобриот српски тенисер од денеска е седми на АТП листата.