Програмскиот колегиум на Македонскиот културен центар или популарен МКЦ од Скопје пред малку издаде соопштение по повод потресите кои се случија од вчера со смената на директорот и именувањето на нов од страна на градските власти на Скопје.
„Деновиве МКЦ повторно е на мета на партиските игри, информација која веќе е
пласирана во јавноста“, се вели во соопштението.
Се појаснува и дека вчера во попладневните часови постоечкиот в.д. директор на МКЦ, Ванчо Богоев кој е 36 години дел од институцијата и кој со својот едвај целогодишен мандат „продолжил во насока на растење и одржување на програмата на МКЦ“, бил сменет од својата позиција поради „неподлегнување на екстремните притисоци од генералниот секретар на Град Скопје да потпише вработување за Арбен Шаќири“.
„Бидејќи, сега веќе екс директорот на МКЦ не ја потпиша таа одлука, од утре МКЦ има нов в.д. директор, Никола Алексов, дипломиран детектив, кој е примен пред два дена преку Агенција за привремени вработувања во МКЦ без никакво искуство во културна институција“, се наведува во соопштението.
„И покрај признанието кое дојде како круна на нашето работење со наградата ’13
Ноември’ за заслуги во областа на културата и масовната посетеност, можеби и
најголема во историјата на институцијата по повод 50 годишниот јубилеј, годината
почна со лоши вести за иднината на МКЦ. Првата е онаа дека буџетот ни е доведен до само 8 отсто од годишниот буџет со кој работевме минатите години, а веднаш потоа и последните случувања во начинот на инсталирање на директор во МКЦ“, велат од оваа култна институција.
Колегиумот исто така наведува дека овие решенија се со цел да се избегне отворен конкурс за директор, на кој би можеле да се пријават сите квалификувани професионалци од областа на културата.