Неколкучасовен хепенинг, со сценски ласери, голем огномет и перформанс на балканската музичка ѕвезда, Дино Мерлин. Вака беше дочекан влезот во третата декада од 21 век на преполниот плоштад „Македонија“ во Скопје кој собра над 50.000 лица.

На студената декемвриска ноќ се пркосеше со греано вино, лименки пиво и по некоја петарда, средство што никако не може да се искорени како пропратен елемент за новогодишните прослави. И, секако, со добропознатите хитови на популарниот гостин од Сараево кој го одржуваше веселото расположение меѓу присутните на настанот во организација на град Скопје.

Атмосферата дополнително ја кренаа сценските ласери и повеќеминутниот огномет на полноќ со кој се означи почетокот на новата 2020 година. Забавата на плоштадот „Македонија“ почна во 20:30 часот со настап на музичките групи „Gypsy Groove“ и „Суперхикс“ кои ги загреаја граѓаните за шоуто што следуваше.

Плоштадот „Македонија“ во изминатиот месец беше центар на новогодишните и Божикни празнувања во Скопје, а жителите на главниот град, како и домашните и странски туристи, имаа можност да ја почувствуваат празничната магија и да уживаат во најразновидна забавна програма.

Најголем интерес кај посетителите побуди дигиталната новогодишна елка, како и новогодишните куќички на населбата „Винтерленд“ кои беа сместени на плочникот меѓу ГТЦ и плоштадот. Во близина на куќичките имаше и мала сцена на која секојдневно се организираа настани и концерти за најразлични возрасти.