Министерот за животна средина Насер Нуредини, кој в понеделник ќе има средба со в.д. директорот на депонијата „Дрисла“, Коста Начевски, вели дека единствен опасен отпад во земјата е комуналниот отпад. За отпадот, пак, што се увезува, потенцира дека е за рециклирање и за повторна употреба.
„Единствен опасен отпад што го имаме во нашата земја е комуналниот отпад. Не дозволуваме да се увезува каков било отпад за депонии или некакво складирање. Отпадот што се увезува е за рециклирање и за повторна употреба и ништо друго. Ако постои сомнеж за какви било активности од тој тип, ќе покренеме истрага со надлежните и ќе се осигураме тоа никогаш да не се случи“, изјави Нуредини.
За тоа кој ја врши контролата на она што влегува во земјата како отпад и кој ја има најголемата одговорност, министерот за животната средина вели дека тие како институција креираат политики и дека царината мора да знае што се увезува во земјата.
„Дозвола за увоз може да се добие единствено за рециклирање и за повторна употреба на отпад. Кој е одговорен? – Цариниците мора да знаат што се увезува во земјата. Постојат правила и прописи дека контролата на граничните премини мора да биде темелна. Ќе ги поддржиме на секаков можен начин“, рече Нуредини.
Прашањето за опасниот отпад и воопшто за отпадот се актуализира откако Обвинителството во Бургас отвори истрага за нерегулиран увоз на 25 контејнери со италијански отпад на пристаништето во бугарскиот град. Со случајот се поврзува трговското друштво „Блацион“ ООД, со адреса и седиште во Софија, а удел во неговото сопствеништво имаат Блаже Игњатовски и Горан Ангелов, кој до неодамна беше на чело на „Дрисла“.
Според Обвинителството во Бургас, отпадот откриен во контејнерите не е радиоактивен или токсичен, но, сепак, утврдена е неусогласеност меѓу наведеното во документацијата на контејнерите и нивната содржина.
Отпадот е транспортиран со брод на 5 септември минатата година и му е определен режим на времено складирање во рок од 90 дена. Истрагата продолжува, се земаат примероци од сите контејнери, а ќе биде побарана и меѓународна потерница за истрагата, бидејќи контејнерите доаѓаат од Италија.