МВР распиша национална потерница по Игор Спасов по барање на штипскиот Суд, откако Спасов не беше пронајден во својот дом во Штип.

Специјалецот Игор Спасов,  е осуден на 14 години затвор за убиството на Мартин Нешковски. Тој е во затвор од 2011 година и досега одлежа 6 години од казната. Во потерницата е наведено дека Спасов се бара за „доиздржување на казната затвор од 7 години и 3 месеци“.

Доколку истражните органи не го пронајдат и на територија на државата, повторно се известува Судот, кој дава согласност за издавање на меѓународна потерница. Министерот за внатрешни работи Оливер Спасовски,  рече дека бегството на Спасов не е надлежност на МВР, туку на Министерството за правда.

– При издржувањето затворска казна МВР нема никаква надлежност, тоа е под Министерството за правда, КПД ги донесуваат одлуките по нивни проценки што треба да соодветствуваат на соодветни сознанија дали и во кои услови затворени лица треба и може да бидат привремено пуштани на слобода, рече Спасовски,

Тој посочи дека општеството не може да се справува со криминалот со ноншалантно однесување на институциите, независно дали се работи за обвинител, судија или раководител на КП установа.

По  завршениот отпуст кој му бил одобрен поради нарушено здравје, Спасов не се врати на доиздржување на затворската казна во Идризово на 18 октомври.

Спасов бил на отпуст цела година откако штипскиот суд му одобрил лекување поради здравствени причини.