Опозициската ВМРО ДПМНЕ соопшти дека вчеравечер по одржаните протести пред СОбранието против Договорот со Грција и промена на уставното име и Уставот, врз зградата на партијата била фрлена црвена боја. Заова тие обвинија структури блиски до власта.
-Нападот на ВМРО-ДПМНЕ е акт на насилство и вандализам. Но и напад на сите оние кои ги штитат македонските националните интереси. Индициите за ова говорат дека одговорноста за ваквиот напад се структури блиски до власта – по принцип на шарената револуција, рече генералниот секретар на партијата ИгорЈанушев.
Од партијата велат дека ваквите индиции ги базираат на сознанија дека власта подготвува, како што рече, „насилно сценарио спроведувано од свои инсталации и полициски структури чија цел е да го втурне ВМРО-ДПМНЕ во насилство како би можело полесно да се делегитимира нашата борба против капитулацијата на Зоран Заев со договорот за името“.
-Власта преку овие и слични провидни провокации посакуваат нов 27 -ми април, каде Зоран Заев би се прикажал за жртва, а ВМРО-ДПМНЕ би била оцрнета. ВМРО-ДПМНЕ има прецизни информации за оперативци од полициските структури кои финансираат и подбуцнуваат насилство кое треба да се насочи кон ВМРО-ДПМНЕ. Во ова се вклучени и лица од раководството на СДСМ. Впрочем на сето ова претходела и една средба во еден од скопските кафулиња каде лица од СДСМ биле во друштво со лица со дебело полициско досие, при што биле стимулирани да предизвикаат насилство, рече Јанушев.
Од партијата ги повикаа членовите да се воздржат од било какви провокации, а од надлежните органи побараа соодветна реакција.
Во спротивно, Јанушев најави дека „ќе бидеме приморани да се самоорганизираме со цел да обезбедиме минимум безбедност“.
На новинарско прашање, што значи самоорганизирање за заштитување, дали тоа значи дека ќе постават вооружени стражи, Јанушев рече:
–Ве молам да не ги преувеличуваме работите, ќе ги преземеме сите чекори со цел да ја заштитиме нашата безбедност и сигурност, бидејќи како што гледаме полицијата не е во можност да го направи тоа, а сите механизми се во рацете на власта, рече тој.