Од денеска па до 21 мај сите микро, мали и средни компании, како и граѓански организации ќе можат да се пријават на јавниот повик „ОброкЗаСите“ кои ќе ги финансира најиновативните решенија за обезбедување храна за сиромашните граѓани.
„ОброкЗаСите“ цели кон изнаоѓање на иновативно, системско и одржливо решение за обезбедување на храна за лица и семејства со реална потреба од поддршка на заедницата. Со решението ќе се овозможи вишокот храна од производителите на храна, дистрибутерите, трговците, угостителските објекти и домаќинствата што би сакале да бидат дел од оваа платформа, ефикасно да биде распределена и доставена до одредени места каде социјално загрозени граѓани имаат пристап, рече на денешната прес-конференција Јован Деспотовски, директор на Фондот за иновации и технолошки развој.
– Овој повик треба да овозможи да се најде иновативно решение за да се обезбеди храна на сите. Да осмислиме систем што ќе значи собирање на вишоците храна кои остануваат и во моментов завршуваат на отпадите и да се насочат кон оние граѓани за кои оваа храна значи многу бидејжи живеат во сиромаштија, рече Мила Царовска.
Таа смета дека развојот на социјалното претприемништво треба да придонесе за развој на солидарноста во општеството затоа што постојат повеќе групи на граѓани кои живеат под социјален ризик.
Јавниот повик е објавен од страна на Фондот за иновации и технолошки развој и Министерство за труд и социјална политика. Вкупниот буџет е два милиони денари, а од вкупните трошоци само 10 проценти ќе бидат на товар на апликантот.