Мисијата на ОБСЕ/ОДИХР го започна процесот на набљудување за локалните избори, закажани за 15 октомври.
Изборите во 80 општини и во Градот Скопје ќе ги следат 336 набљудувачи на ОБСЕ/ОДИХР.
Амбасадорката Одри Гловер, шеф на мисијата, на денешната прес-конференција посочи дека 16 експерти на ОБСЕ/ОДИХР се веќе во земјава, а ним оваа недела ќе им се придружат уште 20 долгорочни набљудувачи, кои ќе бидат распоредени низ целата земја, во тимови по двајца, започнувајќи од 18 септември.
Пред локалните избори во Македонија ќе допатуваат уште 300 краткорочни набљудувачи кои ќе ги следат изборите во сите општини во земјата.
Мисијата на ОБСЕ/ОДИХР ќе ја оценува усогласеноста на овие избори со заложбите на ОБСЕ и со другите меѓународни обврски и стандарди за демократски избори, како и со домашните прописи.
Набљудувачите, како што истакна амбасадорката Гловер, внимателно ќе го следат процесот на регистрација на кандидатите и гласачите, кампањските активности, работата на изборната администрација и соодветните владини институции, изборната регулатива и нејзината имплементација и решавањето на изборните спорови.
На денот на изборите набљудувачите ќе го следат отворањето на глчасачките места, гласањето, пребројувањето на гласачките ливчиња и сумирањето на резултатите.
Мисијата ќе објави еден периодичен извештај во текот на својата работа, на денот на изборите, ќе биде дадена изјава за првичните наоди и заклучоци, додека конечниот извештај за набљудувањето ќе го објави околу осум недели по завршувањето на изборниот процес.