Основното јавно обвинителство Скопје поднесе Обвинителен акт против докторот гинекологот Никола Дамчевски, кој како што се вели во сооопштението, во периодот од септември 2015 до април 2016 година презентирал состојба на лажна симулирана бременост на пациентка врз која претходно спровел биолошки потпомогнато оплодување.
Обвинетиот се товари дека сторил кривично дело – Тешки дела против здравјето на луѓето од член 217 ст.1 вв со чл.207 ст.1 од КЗ и кривично дело – Фалсификување на исправа од член 378 ст.3 вв со ст.1 вв со чл.45 од КЗ.
Од ОЈО објаснуваат натаму го објаснуваат случајот, дека лекарот иако знаел дека оштетената не е бремена, врз неа вршел редовни контролни гинеколошки прегледи со ехо апарат, презентирал лажни ехо снимки на кои се гледа плод, презентирал лажна срцева акција на плодот, мерел должина и тежина на плодот, го утврдил полот на плодот, вербално на секој преглед детално ја објаснувал секоја наводна снимка од плодот, правел и скрининзи со писмени извештаи во кои е наведено дека на ехото се гледа плод во различна гестациска недела, а потоа договорил и термин за пораѓање. Непосредно пред денот за кога било договорено наводното пораѓање на пациентката осомничениот најпрвин на сопругот на оштетената, а потоа и на оштетената ја открил вистината за лажната бременост.
Случајот го обелодени НОВА, по што пристигнаа голем број сведочења и од други жени, „жртви“ на гинекологот.