Published: Wednesday, July 3, 2019 16:51
Основното јавно обвинителство Скопје поднесе обвинение против три лица за сторено кривично дело – „Насилство“. Во декември лани тие го нападнале тогашниот еконономски директор на Клиниката за гинекологија Ваљон Беља и го удирале со тупаници по лицето и телото, а еден од групата и пукал во него и го ранил во десната потколеница.
Но тој што пукал во Беља, не е меѓу обвинетите. Обвинителството соопштува дека МВР привело едно лице како сторител на кривичното дело и било извршено препознавање, но Беља не го препознал па бил ослободен.
„Во присуство на јавен обвинител, согласно Законот за кривична постапка, беше извршено препознавање, но оштетениот не го препозна тоа лице како лицето кое му ја нанело повредата со огнено оружје.Доколку Министерството за внатрешни работи, како овластен орган за утврдување на идентитетот на сторителите на кривични дела, го утврди идентитетот на лицето кое пукало во оштетениот, Основното јавно обвинителство Скопје ќе отвори постапка и против тоа лице“, велат од Обвинителство.
Ваљон Беља од ДУИ беше нападнат во скопската населба Чаир. Во него беше пукано со два куршуми. Беља од пред два месеци е сменет од функцијата економски директор.