Александар Василевски Нинџа, обвинет за насилствата од 27 април, иако не бил вработен во УБК, сепак дејствувал како тамошен вработен, а располагал и со ресурси од управата, односно имал два блиндирани автомобили.
-Нинџа имаше џип со петти степен на блиндираност и автомобил со седми степен на блиндираност, и двата од УБК. Исто така поседуваше и значка од УБК, но и радио станица кое го покриваше реонот на СВР Скопје. Таа беше наштелувана да се слушаат разговорите, но не и да се враќа, откри обвинетиот Михаил Младеновски на денешното рочиште за 27 април, објави Фокус.
Неговиот брат, исто така обвинет во случајот, Стефан Младеновски претходно во сведочењето истакна дека зад упадот во Собранието стојат високи функционери во УБК, на чело со тогашниот директор Владимир Атанасовски, но и на Александар Василевски Нинџа.
Неговата верзија ја потврди и Михаил Младеновски.
Тој раскажа дека фантомките кои им биле делени на луѓето ги платил Нинџа, а за тоа било побарано и сметко потврда за да се повратат парите.
Исто како и неговиот брат, Михаил откри шокантна информација, односно дека по упадот во Собранието, кај Жена парк пристигнал Никола Бошковски со службено возило на УБК во кое имало оружје.
-Ми покажа дека има оружје, за кое ми рече дека треба да се подели на луѓе кои имаат искуство со оружје, претежно на поранешни припадници на лавовите. Потребата се гледаше од информацијата дека се упатиле вооружени Албанци. Сепак оружјето не се подели бидејќи стигна информација од Синиша Алексовски, советник на претседателот Ѓорги Иванов, дека претседателот ќе прогласи воена состојба, и дека војници веќе се распоредени, рече Младеновски.
Зградата на ДИК требало да биде нападната со молотови коктели
Младеновски во сведочењето рече и дека неколку месеци пред упадот во Собранието, зградата на ДИК требало да се нападне со молотови коктели, за да се издејствува приговорите на ВМРО-ДПМНЕ да се прифатат, а кои беа поднесени по парламентарните избори во 2016 година.
-Во 2016 година се запознав со Владимир Атанасов, директорот на УБК, и тоа во кафичот Аристократ, преку Александар Василевски Нинџа. Тогаш Нинџа ми кажа дека Владимир е негов личен пријател и дека откако тој е на чело на УБК ќе добие моќ од аспект на користење на ресурси, односно логистика од одредени функционери, сведочеше Младеновски.
Тој појасни дека по завршувањето на изборите, следувале приговорите пред ДИК, кога се добило насока дека треба да се изврши притисок врз ДИК за да одредени приговори одат во полза на ВМРО-ДПМНЕ.
-Еден ден пред протестот во ДИК, имавме средба во кафичот Аристократ. На средбата присуствуваа функционери од УБК, односно директорот Владимир Атанасовски, Никола Бошковски, кој е во бегство во Грција, Дејан Димковски Боксер, вработен во Петтата управа, Мери, од кабинетот на директорот на УБК, Александар Василевски Нинџа, Никола Митревски Кољо, а бев и јас. Тогаш ни беше кажано дека треба да се оди пред ДИК, да има машка популација која ќе стои во првите редови и по одредена насока ќе треба да се дејствува со молотови коктели врз зградата, рече Младеновски.
Тој откри дека за оваа тема комуницирале и на вибер, но се користеле шифри.
-Шифрата на Нинџа беше “самурај”. Имаше и шифри за сценаријата. Шифрата 1 значеше дека вечерта ќе се дејствува кон зградата на ДИК, односно да се фрлат молотовите коктели, кои беа оставени во паркот кај едни грмушки. Шифрата 0 бешенда не се дејствува, а така и се случи, откри обвинетиот Младеновски.