Јавен обвинител од Тетово, заедно со екипа од СВР Тетово и надлежни инспекциски служби врши увид во фирма лоцирана во слободната индустриска зона, во близина на тетовското село Сараќино, каде што вчера беа затруени 220 работници од фабриката Леар.
„Утринава од страна на тетовската клиничка болница во СВР Тетово било пријавено дека во болницата се донесени над 200 затруени лица, вработени во фирмата. Според првичните сознанија лицата се затруле најверојатно од храната што ја консумирале околу еден часот по полноќ, додека два часа подоцна ги почувствувале првите симптоми, се жалеле на болки во стомакот, повраќање и вртоглавица. Повеќето од затруените лица се задржани во тетовската, а дел се префрлени во гостиварската болница, за укажување на соодветна лекарска помош“, пишува во соопштението на Обвинителството.
220 работници од фабриката Леар во технолошко развојната зона кај Тетово изминатата ноќ се пожалиле на симптоми на труење и биле примени во болниците во Тетово и Гостивар.
Според информациите од полицијата, болничкиот персонал во 4:40 минути после полноќ ги примил работниците, откако тие во еден часот по полноќ вечерале во мензата на фабриката.
По околу два часа од вкупно 264 работници колку што биле на работа, кај 220 од нив се појавиле првите симптоми на труење од храна – повраќање, болки во стомакот, вртоглавица и слично.