Една од обвинителките во СЈО денеска дала исказ во Обвинителството за гонење на организиран криминал и корупција во врска со аферата „Рекет“ – потврдија за НОВА од Обвинителството.

Неофицијално се дознава дека исказ дала обвинителката Елизабета Јосифовска – која пред два дена изјави дека по барање на шефицата на СЈО Катица Јанева го потпишала решението на Камчев да му се врати пасошот.

-Кај мене стигна готово мислење од Јанева, изготвено од соодветни стручни соработници. Ми кажаа дека ова позитивно мислење е по налог на Јанева, која му кажала на лице од кабинетот задолжено за одобрување на такви акти. Ѝ го кажав ова на обвинителката на ‘Империја’ Лиле Стефанова, со која во такви околности се согласивме дека сум должна да потпишам и според Законот, не смеам да одбијам, рече Јосифовска.

Јосифовска како помошник на специјалниот јавен обвинител ги потпишувала документите кога Јанева била отсутна, но не можела да ги менува одлуките.

Јосифовска го потпишала решението за пасошот на Камчев по налог на Јанева

Утре во Обвинителството за организиран криминал исказ треба да даде и Лиле Стефанова – обвинителка од СЈО која ја водеше предистарагата за случајот „Империја“ – во кој беше осомничен и Орце Камчев. Стефанова во изјава за медиумите кажа дека Камчев се обидел да врши влијание на истрагата и дека  одлуки за укинување на куќниот притвор на Камчев и за враќање на пасошот ги донела Катица Јанева.