Застапникот на обвинението против поранешниот генерален секретар на Владата Драги Рашковски во судскиот предмет во јавноста познат како „Софтвери“, обвинителката Ивана Трајчева, на денешното рочиште изведуваше материјални докази против седуммината обвинети за злоупотреба на службената положба и овластување и перење пари и други приноси од казниво дело, како и за помагање во извршувањето на злоупотребата. Обвинителката во судницата презентираше вибер комуникација помеѓу обвинетите во која, како што тврди, Рашковски во телефонот на еден од обвинетите бил запишан како „Перо“.
Од вибер комуникација од 5 јули 2019 беа презентирани вакви пораки: „Нова аудио бомба за Рашковски“, „Не смееме да разговараме за Леонардо“, што како доказен материјал ги прочита обвинителката. „Кој е крив“, „Рашко е крив“, „Б.Ц. е во пензија треба друг да бараме“, „да аплицираме со Инвока и ФИНКИ, па може и да не зборат а ќе не зборат за пари….“, „Трајче ќе го јаде не вие“, беа дел од пораките што беа презентирани.
Рашковски е првообвинет во предметот. Тој е обвинет за злоупотреба на службената положба и овластување, перење пари и други добивки од казниво дело, а второ и трето обвинетите се товарат за помагање во извршувањето на злоупотребата, додека останатите четворица се обвинети дека помагајќи сториле злоупотреба на службената положба и овластување.
Според Обвинителството во временскиот период од јуни 2017 година до февруари 2021 година, во Генералниот секретаријат на Владата, Рашковски помогнат од второ и трето обвинетите извршиле повеќе кривични дела. Притоа Рашковски како генерален секретар не ја извршил својата службена должност при спроведување на четири постапки за јавна набавка за Систем за биометриска идентификација, јавна набавка на софтвер за определување на просечна брзина на возила во сообраќајот и изрекување на казни, набавка на стоки – камери за препознавање на регистарски таблички за возила и јавна набавка на метални кабини за потребите на системот на биометриска идентификација и систем за автоматско препознавање на регистарски таблици.
Во една од постапките за јавна набавка, во кривичното дело свесно му помогнал сопственик и управител на економски оператор, кој е четврто обвинет, а целта им била заработка од 17.474.137 денари или околу 285.000 евра.
Понатаму, како што тврди обвинителството, Рашковски како генерален секретар на Владата, ја искористил својата функција и склучувал авторски договори со физички лица, кои се исто така обвинети во случајот, кои воопшто не извршувале никакви работни задачи, а им биле исплаќани месечни хонорари. Тие воедно, согласно договорот што го имале со Рашковски за поделба на парите, подигнувале дел од исплатените средства во готовина со цел да му ги предадат нему.
Со ваквите дејствија според обвинителството, била нанесена штета на Буџетот на државата во износ од 1.320.000 денари. (С.М.)