Во текот на постапката, надлежниот јавен обвинител ќе ја прибави целокупната документација поврзана со претходната крим евиденција на осомничените. Доколку лицата се осудувани во други држави, јавниот обвинител тоа ќе го има предвид во постапката, велат од Основното јавно обвинителство на прашање на Нова дали обвинителот кој ја води истрагата за убиството на хрватскиот ракометар Денис Тот, ќе бара од неговите словенечки колеги информации во врска со тврдењата на тамошните медиуми дека Анџело Ѓорѓиевски, првоосомничен за убиството наводно бил осудуван во Словенија за кривично дело поврзано со производство и трговија на синтетички дроги во март 2017 година.
Словенечкиот весник Вечер, објави дека Ѓорѓиевски во Марибор предизвикал сообраќајна несреќа после која бил пријавен во полиција. Истрагата, според пишувањето на словенечкиот медиум, открила мала фабрика за производство на синтетички дроги сместена во куќа.
– За наведениот настан во кој се спроведува истражна постапка против три лица за кривично дело убиство од член 123 став 1 во врска со член 22 од Кривичниот законик, интензивно се преземаат истражни дејствија за утврдување на фактите и обезбедување на доказите, но во интерес на постапката во овој момент не сме во можност да споделиме повеќе детали, велат од ОЈО за Нова.
Министерството за внатрешни работи утрово информира дека 28 годишниот А.Ѓ. ноќеска е приведен во скопската населба Аеродором, а околу 2 часот бил спроведен во КПУ Затвор Скопје за издржување на притворот од 30 дена.
Освен А.Ѓ, приведени се и 19-годишната К.Л. и 22-годишниот А.К на кои, исто така, им е одреден 30-дневен притвор. Тие се осомничени дека пред дискотека во Градскиот парк го претепале хрватскиот ракометар Денис Тот кој подоцна почина на скопските клиники.
С.М.