На денешното рочиште за обидот за убиство на Зијадин Села во Собранието сведок во исказот пред судот опиша како Села бил евакуиран.
Тој објасни дека кога го изнеле од прес-центарот го однеле во Клубот на пратеници, каде го прегледала медицинска сестра која рекла дека е тешко повреден и дека е можно да има крварење поради што морало итно да се повика помош.
-Се јавив во Брза помош, од каде ми рекоа дека четири екипи се пратени, ама луѓето не им давале да влезат па ми рекоа да се снаоѓаме, рече сведокот.
Тој раскажа дека го пресоблекле Села и му го измиле лицето.
-Тогаш првпат му го слушнав гласот. Почна да офка и да кажува каде го боли. Постојано влегуваа луѓе и викаа: „Жив ли е, маме му ебам“. Тогаш реков дека мораме да го преместиме бидејќи не е безбеден, истакна сведокот.
Тој појасни дека со помош на обезбедувањето преку прозорец и скали за евакуација го изнеле Села и повторно го внеле во Собранието, но на катот кај канцелариите. Откако наишле на една отклучена канцеларија, го засолниле внатре. Таму сведокот и обезбедувачот Фета барале помош за да се евакуира Села.
Како што раскажа сведокот, тој се јавил на свој пријател Албанец, замолувајќи го за помош, при што пријателот му рекол дека ќе се јави кај свои пријатели во МВР.
– По еден час ми се јави пријателот и рече за пет минути ќе дојде полиција и ќе тропнат пет пати. Така и беше. Кога влегоа ме прашаа што барам тука. Јас објаснив, а истото го потврди и министерот Никола Тодоров, кој им рече дека помагам, рече сведокот.
Тој појасни дека го маскирале Села во полицаец, му дале значка и му врзале црвено-жолта трака на раката.
-По 40 минути ни дадоа маски за дишење, го фативме Села кој беше ставен на носилка и го изнесовме, рече сведокот.
Сведокот денеска препозна четворица од десетте обвинети. За еден од нив, викан Тошта посочи дека застанал кај главата на Села и се обидел да ги спречи понатамошните удари и да вика „немојте бе луѓе, застанете“.
– Имав впечаток дека некој треба да се убие таа вечер. Ако примеше Села уште некој удар сигурно ќе беше мртов, рече сведокот.
Сведокот очевидец на насилствата од 27 април, кој е вработен во едно јавно претпријатие рече дека му се јавиле оти тој ден се влегува во Собранието и треба да отиде. По настанот бил деградиран, а дел од колегите и претпоставените, како што рече, го омаловажувале зошто помагал да се спаси Села. Бил деградиран, од работа во дирекција го испратиле да работи на патарина и секој месец го префрлале на различни патарини.