Експертите на Центарот за меѓународна соработка на Естонија, кој функционира под министерството за надворешни работи на официјален Талин, од денеска, според најавите од американската амбасада за кои пишуваше НоваТВ деновиве, би требало да се во Скопје. Посетата е еден вид турнеја за согледување на теренот за утврдување на факти, во рамки на која, ќе разговараат со владата, претставниците на граѓанскиот сектор, приватниот сектор и донаторската заедница, за да се утврди каде нивните средства во износ од 100.000 долари би можеле да бидат од најголема корист за напредок на Процесот на дигитализација на Северна Македонија.
„Влогот“ на САД во првата фаза на проектот е 250.000 американски долари, а нејзиниот старт ќе се официјализира на 24 септември ( петок) во Скопје а е предвидено да трае 18 месеци.
Амбасадата на САД, заедно со Естонскиот центар за меѓународен развој (ЕСТДЕВ) и Секретаријатот за европски прашања (СЕП) при Владата на Северна Македонија, лансираа „тројно партнерство“ за да обезбедат техничка поддршка и помош од Естонија и нејзините добро водени институции, во насока на поддршка на севкупниот развој на Северна Македонија и на целите поврзани со пристапувањето кон Европската унија (ЕУ). Првата фаза од проектот се фокусира на напорите за дигитализација и е-управување за промовирање на добро управување и економски раст, стоеше во одговорот на Американската амбасада на прашањето на НоваТВ за проектот и неговите цели.
Дигитализацијата, кога е правилно имплементирана, може да донесе огромни придобивки за една земја. Освен едноставното обезбедување подостапни државни услуги, промовира правичност и транспарентност, помага во негување на обновената доверба и се покажа како ефикасна алатка во борбата против корупцијата. Естонија се соочи со истите преодни предизвици во деведесетите години со кои се соочува Северна Македонија денес, и преку (ЕСТДЕВ) може да ги примени научените лекции од нејзиното реформско патување за денешната ситуација овде.
САД имаат геостратешки интерес за демократска и просперитетна Северна Македонија , беше наведено во одговорот на американската амбасада на интересот на НоваТВ за проектот и неговите цели.
М.Т.