Поранешниот англиски фудбалски репрезентативец и носител на „Златната топка“ од 2001 година, Мајкл Овен (37) се пронајде во ново хоби. Кариерата ја заврши во 2013 година во екипата на Стоук, по повлекувањето од зелените терени е повремено ангажиран како аналитичар во емисии посветени на Премиерлигата, а според пишувањата во англиските медиуми негова нова страст се коњите.
Овен неодамна дебитира како џокеј во хуманитарна трка во Ескот во која со грлото „Калдер Принс“ го освои второто место.
„Кога гледате трки со коњи на телевизија се чини дека е лесно, но кога пробав сфатив дека не е така. Многу е тешко да се контролира животно тешко пола тон, чисти мускули, што експлодира додека галопира на патека“, вели Овен.
Тој признава дека не му било воопшто лесно на почетоците и дека притоа се соочувал со бројни проблеми при јавањето.
„Требаше да ослабам, да тренирам. Паѓав од коњот, чувствував болки насекаде. Потешко е одошто замислував“, потенцира поранешниот фудбалер на Ливерпул, на Реал Мадрид, на Манчестер јунајтед, на Њукасл и на Стоук кој постигна 40 гола во 89. настапи за „Гордиот Албион“ во кариерата.
Овен буди најголеми спомени кај фановите на Ливерпул. Дресот на „црвените“ од „Енфилд роуд“ го носеше од 1996 година до 2004 година и во 216. одиграни меча реализира 118 погодоци.