Од МВР потврдија дека едно лице го загуби животот во пожар во општина Аеродром

Во пожар во стан во зграда на ул. „Пандил Шишков“ во Скопје утрово животот го загуби Г.Б. (76).

Како што соопштија од МВР, околу 6.40 часот во СВР Скопје е добиена пријава за пожар во стан во зграда на ул. „Пандил Шишков“ во општина Аеродром.

– Од страна на Бригадата за противпожарна заштита пожарот е изгаснат, а во станот е пронајден починат Г.Б. (76). Се преземаат мерки за расчистување на случајот, стои во соопштението.

Претходно, од ЦУК информираа дека екипи на Бригадата за противпожарна заштита на Град Скопје веднаш излегле на терен и го изгаснале пожарот без да се прошири на соседните станови.

Во гаснењето на пожарот интервенирале 15 пожарникари со шест ПП возила.