Ако случајно ве нанесе патот во питорескното гратче Херинген во Германија, и ако имате потреба од градската управа, немојте да се изненадите ако под фотографијата на градоначалникот која стои во холот, видите македонско име и презиме. Под сликата на црномурестиот градоначалник ќе пишува Даниел Илиев. И не, не е грешка. Радовишанецот Даниел (по мајка и татко) веќе втор мандат е градоначалник на Херинген. И беше избран со фантастични 85,4 отсто од гласовите на политички пребирливите Германци.

Се разбира, Илиев е со германско државјанство затоа што е роден Германец. Има 38 години и е член на Социјалдемократската партија на Германија, но во разговор за НоваТВ вели дека партиската припадност не значи ништо, затоа што тој еднакво се грижи за благосостојбата на сите граѓани на Херинген, и за функционалноста на градот кој му е доверен од 1 јули, по вторпат.

„Граѓаните можат да ме контактираат 24 часа, 7 дена во неделата преку лични состаноци, телефон, пошта или социјални медиуми. Се трудам да бидам многу близок со нив. Јас не сум само социјалдемократски градоначалник, туку градоначалник на сите граѓани“, вели тој.

Илиев е роден е во Бад Херсфелд, но живеел уште од детството во Херинген градот во кој е избран за градоначалник. Студирал на Универзитетот Фридрих Шилер во Јена политички науки, јужнославистика и историја на економија. И двајцата негови родители се од Радовиш, но сега и тие живеат и работат во Германија. Неговиот брат е роден исто така во Германија.

Даниел Илиев со претседателот на Германија Франк-Валтер Штајнмаер

На нашето прашање како изгледа еден негов работен ден, дали се среќава со локалното население и какви проблеми најчесто решава тој вели дека секој ден му е различен односно ниту еден не е ист како претходниот.

„Има некои канцелариски рутини, многу потписи. Имаме неколку состаноци или панели. Еднаш месечно Градскиот парламент се состанува за да одлучува за различни прашања за Херинген. Јас сум одговорен за целата администрација. Го посочувам и патот за идниот развој на градот“, вели Илиев.

Во однос на неговите политички обврски како член на партијата вели дека е апсолутно слободен во своите одлуки без разлика што е близок до идеалите на социјалдемократското движење.

Последен пат ја посетил Македонија во 2015 година.

„Кога бев млад, секоја година ја посетував Македонија со моите родители. Сè уште имам многу контакти со моето семејство кое живее таму“, дополнува „таткото“ на германскиот град со нешто повеќе од 7.000 жители.

Неговиот совет за градоначалниците во Македонија е секогаш да бидат оптимисти и да бидат тука за нивните граѓани.

Даниел со својата партнерка Вивиен

Инаку, Даниел во своето слободно време сака да спортува, ја сака музиката и ужива во прошетки со неговата партнерка Вивиен и нивното куче Купер.

Маја Терзиова