Руски профили на Твитер објавија повеќе од 45.000 соопштенија на тема „Брегзит“ во рок од 48 часа за време на референдумот во Велика Британија за напуштање на ЕУ минатата година, пишува британскиот весник Тајмс.
Весникот цитира податоци од истражување на Калифорнискиот универзитет во Баркли и од Универзитетот Суонси.
Во повеќето од твитовите имало насоки да се гласа за Брегзит, но имало и твитови во кои се повикува за останување во ЕУ.
Авторите на истражувањето проследиле 156.252 руски профили во кои се споменувал Брегзит. Меѓу нив имало профили под името Svetal 1972, во кој имало 92 твита за Брегзит, вклучувајќи го и оној во кој Британците се повикуваат 23 јуни да го слават како Ден на независноста.
Според аналитичарите, многу од соопштенијата изгледаат како да се од автоматски профили, познати како ботови.
На референдумот во Велика Британија, на 23 јуни минатата година, гласаа 17,4 милиони луѓе, од кои 51,9 отсто се изјаснија за Брегзит, а 48,1 отсто за останување во ЕУ.