Од утре болните од рак ќе добијат цитостатици. Советот за јавни набавки конечно го одобрил тендерот за лекови на Клиниката за онкологија. Оваа информација за НОВА ја потврди директорот Милан Ристески.
„Утре ќе ги има сите лекови на клиниката. Знаеме дека ќе биде турканица и дека сите пациенти ќе дојдат одеднаш, но ние ќе ги примиме сите, никој нема да биде вратен“, изјави Ристески.
Советот за јавни набавки три пати го враќа тендерот за набавка на лекови на Клиниката за онкологија. Пациентите континуирано остануваа без лекови. Последно, без цитостици се болните од рак на дебело црево, со метастази. Тие сами си го купуваат цитостатикот кој чини 100 евра месечно, се разбира кој може да си го дозволи тоа.
Тешко болен човек кој се јави во редакцијата на НОВА, вели дека тој не прима терапија бидејќи не е во можност да го купи лекот за кој треба да плати 100 евра месечно.
„На Клиниката за онкологија го нема лекот. Јас сум без терапија, со мојата пензија од 6000 денари не сум во можност да го купам“, се пожали овој 60 годишен пациент.
Во изминатиот период раководството на клиниката не беше во можност за земе лекови на заем од веледрогерија.
„Не можевме да земеме на реверс, никој не сакаше да даде донации“, рече Ристески.
Агонијата со Советот за јавни набавки трае од почетокот на март, но и претходно пациентите постојано остануваа без цитостатици. На клиниката велат дека доцна го добиле буџетот, па заради тоа подоцна бил донесен планот за јавни набавки.
НОВА ја следи оваа проблематика во континуитет, особено за Советот за јавни набавки кој постојано им ги враќа тендерите на болниците, заради како што велат директорите, членовите на Советот не разбирале медицински термини. Директорите не се осудуваат да се пожалат и ги праќаат пациентите сами да си купуваат лекови.