Од 15.декември Народна банка на Република Македонија ќе ги пушти во оптек двете нови банкноти од 200 и од 2.000 денари, а ќе ја повлече банкнотата од 5.000 денари.
Ова е прва промена што се спроведува по период од 20 години.
„Ваквата одлука е донесена врз основа на истражувања и на анализи на сите постоечки фактори, при што се утврди дека постојат реални потреби за воведување на двата нови апоена. Воведувањето ќе овозможи зголемување на понудата на апоените што се на располагање при вршење готовински трансакции, а како секундарен ефект се очекува баланс на побарувачката за одредени деноминации“, соопшти неодамна НБРМ.
Во врска со повлекувањето на книжната пара од 5.000 денари НБРМ објасни дека нивната примена во секојдневните трансакции била незначителна, а од неа немале голема потреба ниту банките.
Наместо низ годините во оптек да се зголемува количеството на овие банкноти, тоа постојано опаѓало.