Одбиено барањето на Мијалков за Судот да му го врати пасошот

Поранешниот прв човек на тајната полиција, Сашо Мијалков и понатаму останува без својот пасош, бидејќи Кривичниот совет на Основниот суд Скопје 1, донел одлука да се одбие неговото барање, и мерката на претпазливост да остане.

Патната исправа на поранешниот прв човек на УБК му беше одземена како обвинет во случајот „Таргет“ на СЈО, пред осум месеци.

Специјалното јавно обвинителство тогаш бараше притвор, но Кривичниот совет одлучи да му одреди мерка на претпазливост, односно му го одзеде пасошот.

Мијалков е обвинет во четири случаи на СЈО: „Титаник 2“ за изборните измами, „Тортура“ за апсењето на Љубе Бошкоски, „Трезор“ за незаконска набавка на опрема и „Таргет“ за нелегалното прислушување.