На денешното продолжение на судското рочиште за обидот за убиство наз пратеникот Зијадин Села на 27 април, вештакот Здравко Чакар ги потврди наодите што ги дал и пред Обвинителството. Посочи дека од повредите што му биле нанесени на Села, најопасна и најтешка било нагмечувањето на мозокот и десно-челниот оток. Опасноста по животот била од оштетувањето на мозочното ткиво.
На прашање на судот, за колку време според природата на повредите може да настапи смрт, вештакот рече дека не може да се прецизира временски интервал бидејќи секој индивидуално реагира на повредите.
Во конкретниот случај, повредите довеле до понатамошно ширење на последиците, но не и до смртен исход.
Според вештакот Верица Поповска, повредата на Села од десната страна на главата можела да настане од директно делување на тврда сила и ударот би можел да биде и од удар со нога.
Од повредите на Села во мозокот влегол воздух поради што како што рече докторката ова можело да предизвика инфекција, односно воспаление на мозокот.
Додека вештаците го изработувале вештачењето на увид имале и снимка од која се гледало како Села со нога е удрен во главата. На прашање на обвинителот, дали од овој удар настанала повредата од левата страна на главата, докторката рече дека би можело да дојде во обзир дека повредата е од овој удар, но истакна дека Села и пред тоа добивал удари, а тие немале можност на снимка да го видат целиот напад.
На прашањето на обвинителот, дали повредите можат да предизвикуваат трајни последици, вештакот рече дека и по неколку години од нападот може да се појави неврлошки испади.
– Затоа оштетениот и денеска прима терапија која го штити мозокот од епилептични напади, рече докторката.
Забелешка на одбраната беше што кога Села бил примен на КАРИЛ имал нормални наоди кои се разликуваат од оние во извештајот на вештаците, на што вештакот Здравко Чакар одговори дека клиничката слика може да се развие и подоцна како последица на сериозноста на повредите.
Адвокатите на одбраната забележаа дека вештакот немал лиценца за работа во моментот кога се вршела анализата.
Според обвинителот, пак, немало ниту потреба од тоа бидејќи вештачењето е направено од страна на Институтот за судска медицина која е највисока институција во Македонија за оваа проблематика.
Вчера пред судот сведочеше Зијадин Села кој посочи дека во прес-салата бил удрен со монитор и со копје од знаме и оти слушал закани упатени кон него дека ќе биде убиен.
На претходното рочиште адвокатот на Села побара отштета за својот клиент во висина од 30 милиони денари. Средствата што се бараат како отштета се за материјалните трошоци за лекувањето на Села, како и за претрпената физичка болка, повреда на личниот интегритет и за претрпен страв.
Во овој случај обвинети се Кире и Цејо Ѓорѓиевски, Оливер Ошавковски, Саша Ценков, Николче Димитриевски, Александар Јаневски – Тошта, Андреј Мицов, Никола Војминовски, Коста Делов и Стојан Павловски – Кобра.