Во среда ќе продолжи судскиот процес „27 април“ во кој се обвинети нарачателите за крвавиот четврток од 27 април 2017 година. Завршен збор ќе даде поранешниот министер во Владата на ВМРО-ДПМНЕ, Миле Јанакиески. На денешното судење во скопскиот Кривичен суд, завршен збор даде адвокатот Еленко Миланов во одбрана на обвинетите Јанакиески и Спиро Ристовски. Тој се осврна на Законот за амнестија, нагласувајќи дека по сила на закон обвинението не смеело да биде покренато.
– Овој обвинителен акт и оваа постапка не можеше да започне, не можеше воопшто да биде водена, поради Законот за амнестија којшто е прогласен со указ од тогашниот претседател Ѓорге Иванов. Со овој закон за амнестија се ослободуваат од кривично гонење, се запираат поведени кривични постапки и целосно се ослободваат од издржување на казна затвор, лица за кои постои основано сомневаење дека сториле кривично дело поврзано со настаните во Сорабанието на РМ од 27 април 2017 година, рече адвокатот Миланов.
Тој посочи дека Законот за кривична постапка е небулозен, со што Судечкиот совет не може да прекине постапка без одобрение од Обвинителството. На таа основа, побара од Судечкиот совет да донесе ослободителна пресуда. При изнесувањето на завршните зборови прочита голем број цитати од пратеници кои сведочеле за овој случај.
– Овие искази беа пред вас, ги слушавте и сите тие јасно потврдуваат дека ниту постоеше организација на пратеници, ниту пак таква организација правеле Спиро Ристевски или Миле Јанакиевски. Поради настапување на околности поради кои не постои можност за кривично гонење, односно согласно одредбата 402 став 1 точка 6, барам да го одбиете ова обвинение за Спиро Ристевски и Миле Јанакиевски за коишто тоа го истакнувам во овој нивен завршен збор, но исто така и за Вељановски. Сите докази верувам дека доволно Ве убедија дека овие тројца обвинети не го сториле кривичното дело кое им се става на товар, заклучи Миланов.
Денеска во скопскиот Кривичен суд завршен збор даде поранешниот министер Спиро Ристовски. Претходно свој завршен збор даде и поранешниот собраниски спикер, Трајко Вељаноски.
Обвинителството за гонење на организиран криминал и корупција во завршниот збор наведе дека нема дилема оти обвинетите Миле Јанакиески, Спиро Ристовски, Трајко Вељаноски и поранешниот директор на Управата за безбедност и контраразузнавање, Владимир Атанасовски се организатори на упадот во Собранието.