Откако Државната комисија за спречување на корупцијата (ДКСК) вчера најави дека ќе поведе иницијатива за утврдување одговорност за Драги Рашковски до Јавното обвинителство за организиран криминал и корупција, за незаконито постапување со цел примање награда – возило, семејството Рашковски денеска до ова тело и до медиумите испрати допис дека за ова дознале од медиумите и дека ДКСК изнесла еклатантни невистини. Во дописот во кој како дел се наоѓа и фото-галерија на наводно споменуваното од страна на ДКСК возило, меѓу другото се вели: 
– Како орган чија основна задача треба да е откривање на незаконски дејствија со цел да се спречи корипцијата, вие си земавте за право да изнесувате еклатантни невистини и притоа да обвинувате за наводно сторено кривично дело, при тоа самите вршејки кривично дело согласно член 366 од Кривичниот законик. Доколку сте ги собрале документите за кои тврдите дека ги имате, тогаш многу добро знаете дека никој од никаква фирма нема добиено автомобил на поклон.
Секој човек има име и презиме, секој настан има време и место.
Затоа, бараме од Вас, јавно да ги објавите сите документи до кои сте дошле со кои се потврдува евентуалното незаконско дејствие.
Бидејки никој не беше повикан на јавната седница, бараме јавно да одговорите и да доставите докази
- Која е компанијата од која е добиен на поклон автомобил и јавно да го доставите договорот за поклон? Таков договор не постои.
- Јавно да ја објавите процената на автомобилот за кој велите дека има вредност од 50.000 евра, како сте дошле до неа и дали некогаш сте го виделе автомобилот?
- Јавно да ги објавите СИТЕ документи кои ги имате прибрано од Владата на Република Северна Македонија и од надлежните министерства.
- Јавно да ја објавите одлуката врз која наводно е влијаено да биде донесена, начинот на кој е влијаено да биде донесена како и евентуално превземените незаконски дејствија. Такво нешто исто така не постои.
- Иако не е на мое интелектуално ниво, а не треба да е ниту ниво на една институција која ја претставувате, бидејки јавно беше упатена понуда за купопродажба на автомобилот, сопственикот на автомобилот, кој е мој другар преку полномошник Ви соопштува дека прифаќа предметниот автомобил да Ви го продаде за цена од 5.000 евра. Во прилог се фотографиите од истиот.
Ваквите паушални обвинувања фрлаат сомнеж дека намерата е да се наштети на нечија личност, а не на остварување на надлежностите на Вашата институција. Само преку објавување на документите и другите факти може да ги покажете вашите чесни намери. Се друго е замајување на јавноста, се наведува во дописот до Антикорупциска и до медиумите.
Инаку, ДКСК има сомневање за сторено кривично дело од Рашковски по член 359, став 1 и 2 од Кривичниот законик, односно примање награда за противзаконито влијание.
Според Горан Трпеноски, член на ДКСК, кој вчера го образложи овој случај, екс генералниот секретар во Владата, Драги Рашковски и покрај укажувањата од Министерството за транспорт и врски, очигледно тенденциозно, доставувал информација до Владата за градење од гостиварска фирма објекти што се сопственост на државата, која за десеткратно помала цена продала возило на Игор Христов, а тој потоа го подарил на сопругата на Рашковски.