Македонската полиција и обвинителството треба брзо да ги изведат пред правдата одговорните за повреди на најмалку двајца новинари во нападот на Собранието, бара Комитетот за заштита на новинарите (КЗН) со седиште во Њујорк.
“Полицијата има одговорност да ги штити граѓаните, вклучително и новинарите, без разлика кој политичар е на власт. Не смее да се дозволи насилни групи да ги напаѓаат новинарите и да останат неказнети каде и да е. А тоа е особено срамно во демократска нација која бара членство во ЕУ”, изјави Нина Огњанова, координатор на КЗН за Европа и Централна Азија.
Димитар Тануров, новинар во независната агенција Мета, е дел од околу 100 лица, вклучително најмалку 7 пратеници, кои беа повредени во нападот. Тануров изјавил за КЗН дека фотографирал во Собранието со мобилен телефон кога насилните демонстранти му се заканиле, го зеле неговиот телефон и му рекле да престане да слика. Потоа и други демонстранти се придружиле и почнале да го удираат.
“Кога ја видоа мојата пред карта и медиумот за кој работам ме нарекоа предавник, ми го зедоа телефонот и продолжија да ме удираат додека лежев на подот”, изјавил Тануров. Според него, непознато лице го тргнало од тоа место и потоа надвор од зградата. Тануров имал повеќе повреди на лицето и главата но не бил хоспитализиран.
Во соопштението на КЗН се наведува и нападот врз Никола Ордевски, камерман од независната агенција Макфакс.
Уште најмалку четворивца новинари кои го покривале инцидентот биле туркани, удирани и добивале закани а им била земена и опремата но не биле сериозно повредени, наведува КЗН повикувајќи се на Балкан Инсајт.
“Според медиумските извештаи и видеата од Собранието, полицијата на почетокот на интервенирала и им дозволила на демонстрантите да влезат во зградата. На прес конференција министерот за внатрешни работи Агим Нухиу (….) им рекол на новинарите дека полицијата не ја завршила својата работа и дека дел од безбедносните сили биле под политичко влијание”, вели соопштението.
КЗН е невладина организација која работи низ целиот свет за заштита на новинарите.